ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք. Ստեփանակերտ

Համաձայն Լեռնային Ղարաբաղի Հանրապետության անտառային օրենսգրքի 13-րդ հոդվածի 3-րդ մասի` Լեռնային Ղարաբաղի Հանրապետության կառավարությունը ո ր ո շ ու մ է.

1. Սահմանել արտադրական նշանակության անտառներում անտառօգտագործման և պահպանության կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Կ Ա Ր Գ

1. Սույն կարգով սահմանվում է Լեռնային Ղարաբաղի Հանրապետության արտադրական նշանակության անտառներում անտառօգտագործման և պահպանության առանձնահատկությունները:

2. Արտադրական նշանակության անտառների օգտագործման և պահպանության հիմնական նպատակը բնափայտի ու ոչ բնափայտային անտառային ռեսուրսների կայուն և արդյունավետ ստացումն է այնպիսի եղանակներով ու չափերով, որոնց ժամանակ ապահովվում են անտառների կենսաբանական բազմազանությունը, արտադրողականությունը, վերարտադրության ունակությունը, կենսունակությունը և համապատասխան էկոլոգիական, տնտեսական և այլ գործառնությունների իրականացման ներուժը:

3. Արտադրական նշանակության անտառներում թույլատրվում է իրականացնել Լեռնային Ղարաբաղի Հանրապետության անտառային օրենսգրքի 35-րդ հոդվածով սահմանված անտառօգտագործման բոլոր տեսակները:

4. Արտադրական նշանակության անտառներում բնափայտը մթերվում է անտառավերականգնման, միջանկյալ (խնամքի), սանիտարական և այլ հատումների միջոցով` համաձայն հատումների իրականացման, բնափայտի մթերման, անտառների պահպանության, պաշտպանության, վերարտադրության ոլորտները կարգավորող իրավական ակտերի և անտառօգտագործման պայմանագրի պահանջների:

5. Արտադրական նշանակության անտառներում անտառավերականգնման հատումն անտառօգտագործման հիմնական ձև է և կիրառվում է հասուն ու գերհասուն ծառուտներում` ապահովելով Լեռնային Ղարաբաղի Հանրապետության Կարմիր գրքում ընդգրկված ծառատեսակների պահպանությունը, հիմք ընդունելով անտառաշինական նախագծերի (անտառակառավարման պլանների) պահանջները, հատման գծով բնափայտի տարեկան նորման (հաշվարկային հատատեղը), անտառային ծառատեսակների հատման տարիքը:

6. Արտադրական նշանակության անտառներում երկրորդական անտառանյութը մթերվում է անտառօգտագործման պայմանագրի և անտառահատման տոմսի հիման վրա:

7. Երկրորդական անտառանյութի մթերման պայմանագրի հավելվածներում նշվում են`

1) անտառօգտագործման հիմնական պարամետրերը և նորմերը.

2) անտառային ռեսուրսների երկրորդական անտառանյութի ֆոնդը.

3) երկրորդական անտառանյութի անտառային պաշարների մթերման թույլատրելի ծավալը և քանակը.

4) օգտագործման տրամադրվող անտառային տեղամասի տեղադիրքի նկարագիրը, քարտեզագրական կամ սխեմատիկ պատկերը.

5) անտառների պահպանությանը, պաշտպանությանը և վերականգնմանը վերաբերող դրույթները:

8. Արտադրական նշանակության անտառներում ոչ բնափայտային անտառանյութը մթերվում է անտառօգտագործման պայմանագրի և անտառային տոմսի հիման վրա:

9. Ոչ բնափայտային անտառօգտագործման պայմանագրի հավելվածներում նշվում են`

1) անտառօգտագործման հիմնական պարամետրերը և նորմերը.

2) անտառային ռեսուրսների ոչ բնափայտային անտառանյութի ֆոնդը.

3) ոչ բնափայտային անտառանյութի անտառային պաշարների մթերման թույլատրելի ծավալը և քանակը.

4) օգտագործման տրամադրվող անտառային տեղամասի տարածքային տեղադիրքի նկարագիրը, քարտեզագրական կամ սխեմատիկ պատկերը.

5) անտառների պահպանությանը, պաշտպանությանը և վերականգնմանը վերաբերող դրույթները:

10. Արտադրական նշանակության անտառներում կենդանական աշխարհի վերարտադրության կազմակերպման ու օգտագործման նպատակով անտառօգտագործումն իրականացվում է անտառօգտագործման պայմանագրի հիման վրա` «Կենդանական աշխարհի մասին» և «Որսի և որսորդական տնտեսության վարման մասին» Լեռնային Ղարաբաղի Հանրապետության օրենքների պահանջների համաձայն:

11. Կենդանական աշխարհի վերարտադրության կազմակերպման և օգտագործման նպատակով անտառօգտագործման պայմանագրի հավելվածներում նշվում են`

1) որսահանդակների նկարագիրը (անտառային քարտեզ-սխեման).

2) տեղեկություններ որսի օբյեկտ հանդիսացող կենդանական աշխարհի տեսակների և դրանց պահպանության համար անհրաժեշտ միջոցառումների մասին.

3) օգտագործման տրամադրվող անտառային տեղամասի տեղադիրքի նկարագիրը, քարտեզագրական կամ սխեմատիկ պատկերը.

4) անտառների պահպանությանը, պաշտպանությանը և վերականգնմանը վերաբերող դրույթները:

12. Արտադրական նշանակության անտառներում գիտահետազոտական և ուսուցման նպատակով անտառօգտագործումն իրականցվում է անտառօգտագործման պայմանագրի և անտառային տոմսի հիման վրա:

13. Գիտահետազոտական և ուսուցման նպատակով անտառօգտագործման պայմանագրի հավելվածներում նշվում են`

1) գիտահետազոտական և ուսուցման ոլորտի գործունեության ծրագիրը.

2) օգտագործման տրվող անտառային տեղամասում նախատեսվող աշխատանքների ծավալի և տեսակների հիմնավորումն ու նկարագիրը.

3) օգտագործման տրամադրվող անտառային տեղամասի տեղադիրքի նկարագիրը, քարտեզագրական կամ սխեմատիկ պատկերը.

4) անտառների պահպանությանը, պաշտպանությանը և վերականգնմանը վերաբերող դրույթները:

14. Արտադրական նշանակության անտառներում մշակութային, առողջարարական, սպորտի, հանգստի և զբոսաշրջության նպատակով անտառօգտագործումն իրականացվում է անտառօգտագործման պայմանագրի և անտառային տոմսի հիման վրա:

15. Մշակութային, առողջարարական, սպորտի, հանգստի և զբոսաշրջության նպատակով անտառօգտագործման պայմանագրի հավելվածներում նշվում են`

1) օգտագործման տրվող անտառային տեղամասում նախատեսվող աշխատանքների ծավալի և տեսակների հիմնավորումն ու նկարագիրը.

2) օգտագործման տրամադրվող անտառային տեղամասի տեղադիրքի նկարագիրը, քարտեզագրական կամ սխեմատիկ պատկերը.

3) անտառների պահպանությանը, պաշտպանությանը և վերականգնմանը վերաբերող դրույթները:

16. Անտառների պահպանության հետ կապված հարաբերությունները կարգավորվում են անտառային ոլորտը կարգավորող իրավական ակտերով սահմանված ընդհանուր հիմունքներով: