ԸՆՏՐԱԿԱՆ ՏԵՂԱՄԱՍԵՐԻ ՀԱՄԱՐԱԿԱԼՄԱՆ ԿԱՐԳԸ

ՍԱՀՄԱՆԵԼՈՒ ՄԱՍԻՆ

Ղեկավարվելով Արցախի Հանրապետության ընտրական օրենսգրքի 16-րդ հոդվածի 2-րդ մասով` Արցախի Հանրապետության կենտրոնական ընտրական հանձնաժողովը որոշում է.

1. Սահմանել, որ

1) ընտրական տեղամասերը համարակալում են տարածքային ընտրական հանձնաժողովները` m/n տեսքի թվազույգով, որտեղ m-ը համապատասխան տարածքային ընտրական հանձնաժողովի համարն է (Ստեփանակերտ՝ թիվ 1, Ասկերան՝ թիվ 2, Հադրութ՝ թիվ 3, Մարտակերտ՝ թիվ 4, Մարտունի՝ թիվ 5, Շահումյան՝ թիվ 6, Շուշի՝ թիվ 7, Քաշաթաղ՝ թիվ 8), իսկ n-ը՝ ընտրական տեղամասի հերթական համարը: Ընտրական տեղամասերը համարակալելիս նշվում է նաև տեղամասի գտնվելու վայրի (համայնքի) անվանումը.

2) համապետական ընտրությունների դեպքում ընտրական տեղամասերը համարակալվում են ըստ տարածքային ընտրական հանձնաժողովների սպասարկման տարածքների: Յուրաքանչյուր տարածքային ընտրական հանձնաժողովի սպասարկման տարածքում ընտրական տեղամասերի համարակալումը կատարվում է սկսած 1-ից՝ մինչև տվյալ տարածքային ընտրական հանձնաժողովի սպասարկման տարածքում գտնվող հերթական վերջին ընտրական տեղամասը.

3) տեղական ինքնակառավարման մարմինների (բացառությամբ Ստեփանակերտ քաղաքի համայնքի ղեկավարի և ավագանու) ընտրությունների դեպքում, ընտրական տեղամասերը համարակալվում են ըստ համայնքների` սույն կարգի 1-ին մասի 1-ի կետով սահմանված կարգով, հաշվի առնելով «Լեռնային Ղարաբաղի Հանրապետության վարչատարածքային բաժանման մասին» օրենքով նախատեսված համայնքների և բնակավայրերի սահմանման հերթականությունը.

4) տեղական ինքնակառավարման մարմինների (բացառությամբ Ստեփանակերտ քաղաքի համայնքի ղեկավարի և ավագանու) ընտրությունների դեպքում, յուրաքանչյուր տարածքային ընտրական հանձնաժողով համարակալում է այն համայնքների ընտրական տեղամասերը, որտեղ կազմակերպում և անցկացնում է ընտրությունները.

5) այլ պետություններում Արցախի Հանրապետության դիվանագիտական կամ հյուպատոսական ներկայացուցչություններում կազմավորված ընտրական տեղամասերը համարակալում է համապատասխան դիվանագիտական ներկայացուցչության կամ հյուպատոսական հիմնարկի ղեկավարը` m/n տեսքի թվազույգով, որտեղ m-ը համապատասխան դիվանագիտական ներկայացուցչության կամ հյուպատոսական հիմնարկի գտնվելու վայրի անվանումն է, իսկ n-ը՝ տվյալ դիվանագիտական ներկայացուցչության կամ հյուպատոսական հիմնարկի գտնվելու վայրում կազմավորվող ընտրական տեղամասի հերթական համարը`յուրաքանչյուր քաղաքի համար` սկսած 1-ից` մինչև տվյալ քաղաքում կազմավորված հերթական վերջին ընտրական տեղամասը:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից: