ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք. Ստեփանակերտ

Համաձայն Լեռնային Ղարաբաղի Հանրապետության անտառային օրենսգրքի 11-րդ հոդվածի 3-րդ մասի` Լեռնային Ղարաբաղի Հանրապետության կառավարությունը ո ր ո շ ու մ է.

1. Սահմանել պաշտպանական նշանակության անտառներում անտառօգտագործման և պահպանության կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Կ Ա Ր Գ

1. Սույն կարգով սահմանվում է Լեռնային Ղարաբաղի Հանրապետության պաշտպանական նշանակության անտառներում անտառօգտագործման և պահպանության առանձնահատկությունները:

2. Պաշտպանական նշանակության անտառները միջավայրը կայունացնող և կարգավորող կարևոր գործոն են, և ունեն դաշտապաշտպան, այգեպաշտպան, ճանապարհապաշտպան, կլիմայակարգավորիչ, ջրակարգավորիչ, հակաէրոզիոն, կենսաբազմազանության պահպանության ու հանգստի (ռեկրեացիոն) գործառույթներ և առաջնահերթ օգտագործվում է բնակչության մշակութային, առողջարարական, սպորտի, հանգստի և զբոսաշրջության նպատակով:

3. Պաշտպանական նշանակության անտառներում չի թույլատրվում իրականացնել երկրորդական անտառանյութի մթերում և անտառավերականգնման հատումներ, իսկ Լեռնային Ղարաբաղի Հանրապետության անտառային օրենսգրքի 35-րդ հոդվածով սահմանված մնացած անտառօգտագործման տեսակները թույլատրվում է, եթե դա չի հակասում տվյալ անտառահատվածի պաշտպանական նշանակությանը:

4. Պաշտպանական նշանակության անտառներում բնափայտի մթերումը իրականացվում է միայն խնամքի ու սանիտարական հատումների ժամանակ` հիմք ընդունելով անտառաշինական նախագծերի (անտառակառավարման պլանների) պահանջները, հատման գծով բնափայտի տարեկան նորման (հաշվարկային հատատեղը):

5. Պաշտպանական նշանակության անտառներում կարող են իրականացվել նաև այլ հատումներ: Անտառաշինական նախագծերի բացակայության կամ ժամկետանց ճանաչվելու դեպքում բնափայտը մթերվում է Լեռնային Ղարաբաղի Հանրապետության անտառային օրենսգրքի 36-րդ հոդվածի 3-րդ մասի դրույթներին համապատասխան:

6. Պաշտպանական նշանակության անտառներում միջանկյալ (խնամքի) և սանիտարական հատումների ժամանակ բնափայտի մթերման և անտառից դուրսբերման ժամանակ անտառօգտագործողը պարտավոր է պահպանել անտառային ոլորտը կարգավորող իրավական ակտերի և անտառօգտագործման պայմանագրի պահանջները:

7. Պաշտպանական նշանակության անտառներում կարող է իրականացվել ոչ բնափայտային անտառանյութի մթերում` անտառօգտագործման պայմանագրի և անտառային տոմսի հիման վրա, իսկ անտառային հողատարածքների օգտագործումը գյուղատնտեսական նպատակով` վարձակալության պայմանագրի հիման վրա, միևնույն ժամանակ հաշվի առնելով օգտագործվող անտառատարածքի պաշտպանական նշանակության ապահովվումը:

8. Ոչ բնափայտային անտառօգտագործման պայմանագրի հավելվածներում նշվում են`

1) անտառօգտագործման հիմնական պարամետրերը և նորմերը.

2) անտառային ռեսուրսների ոչ բնափայտային անտառանյութի ֆոնդը.

3) ոչ բնափայտային անտառանյութի անտառային պաշարների մթերման թույլատրելի ծավալը և քանակը.

4) օգտագործման տրամադրվող անտառային տեղամասի տարածքային տեղադիրքի նկարագիրը, քարտեզագրական կամ սխեմատիկ պատկերը.

5) անտառների պահպանությանը, պաշտպանությանը և վերականգնմանը վերաբերվող դրույթները:

9. Պաշտպանական նշանակության անտառների ջրային օբյեկտների ջրապահպան գոտիներում արգելվում են`

1) ջրային ռեժիմի խախտում առաջացնող ցանկացած գործողություն.

2) թունաքիմիկատների օգտագործումն անտառների պաշտպանության նպատակով, ինչպես նաև հանքային պարարտանյութերի օգտագործումը.

3) Լեռնային Ղարաբաղի Հանրապետության օրենսդրությամբ սահմանված թույլատրելի նորմերը գերազանցող արտանետումներ և կեղտաջրեր առաջացնող տեխնոլոգիաների օգտագործումը:

10. Պաշտպանական նշանակության անտառներում կենդանիների վերարտադրության կազմակերպումն ու օգտագործումն իրականացվում է անտառօգտագործման պայմանագրի հիման վրա` «Կենդանական աշխարհի մասին» և «Որսի ու որսորդական տնտեսության վարման մասին» Լեռնային Ղարաբաղի Հանրապետության օրենքների համաձայն:

11. Կենդանական աշխարհի վերարտադրության կազմակերպման և օգտագործման նպատակով անտառօգտագործման պայմանագրի հավելվածներում նշվում են`

1) որսահանդակների նկարագիրը (անտառային քարտեզ-սխեման).

2) տեղեկություններ որսի օբյեկտ հանդիսացող կենդանական աշխարհի տեսակների և դրանց պահպանության համար անհրաժեշտ միջոցառումների մասին.

3) օգտագործման տրամադրվող անտառային տեղամասի տեղադիրքի նկարագիրը, քարտեզագրական կամ սխեմատիկ պատկերը.

4) անտառների պահպանությանը, պաշտպանությանը և վերականգնմանը վերաբերվող դրույթները:

12. Պաշտպանական նշանակության անտառներում գիտահետազոտական և ուսուցման նպատակով անտառօգտագործումն իրականացվում է անտառօգտագործման պայմանագրի և անտառային տոմսի հիման վրա:

13. Գիտահետազոտական և ուսուցման նպատակով անտառօգտագործման պայմանագրի հավելվածներում նշվում են`

1) գիտահետազոտական և ուսուցման ոլորտի գործունեության ծրագիրը.

2) օգտագործման տրվող անտառային տեղամասում նախատեսվող աշխատանքների ծավալի և տեսակների հիմնավորումն ու նկարագիրը.

3) օգտագործման տրամադրվող անտառային տեղամասի տեղադիրքի նկարագիրը, քարտեզագրական կամ սխեմատիկ պատկերը.

4) անտառների պահպանությանը, պաշտպանությանը և վերականգնմանը վերաբերվող դրույթները:

14. Պաշտպանական նշանակության անտառներում մշակութային, առողջարարական, սպորտի, հանգստի և զբոսաշրջության նպատակով անտառօգտագործումն իրականացվում է անտառօգտագործման պայմանագրի և անտառային տոմսի հիման վրա:

15. Մշակութային, առողջարարական, սպորտի, հանգստի և զբոսաշրջության նպատակով անտառօգտագործման պայմանագրի հավելվածներում նշվում են`

1) օգտագործման տրվող անտառային տեղամասում նախատեսվող աշխատանքների ծավալի և տեսակների հիմնավորումն ու նկարագիրը.

2) օգտագործման տրամադրվող անտառային տեղամասի տեղադիրքի նկարագիրը, քարտեզագրական կամ սխեմատիկ պատկերը.

3) անտառների պահպանությանը, պաշտպանությանը և վերականգնմանը վերաբերվող դրույթները:

16. Լեռնային Ղարաբաղի Հանրապետության անտառային օրենսգրքի 11-րդ հոդվածով նախատեսված այլ պաշտպանական նշանակության, անտառների պահպանության և անտառօգտագործման հետ կապված` սույն կարգով չնախատեսված հարաբերությունները կարգավորվում են անտառային ոլորտը կարգավորող իրավական ակտերով սահմանված ընդհանուր հիմունքներով: