ք.Ստեփանակերտ

ՋՐԱՅԻՆ ՀԱՄԱԿԱՐԳԵՐԸ ՈՌՈԳՄԱՆ, ԱՐՈՏԱՎԱՅՐԵՐԻ ՋՐԱՐԲԻԱՑՄԱՆ, ՀՈՂԵՐԻ ԼՎԱՑՄԱՆ ՈՒ ԱՂԱԶԵՐԾՄԱՆ ԵՎ ԳՅՈՒՂԱՏՆՏԵՍԱԿԱՆ ԱՅԼ ՆՊԱՏԱԿՆԵՐՈՎ ՕԳՏԱԳՈՐԾԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

Լեռնային Ղարաբաղի Հանրապետության ջրային օրենսգրքի 121-րդ հոդվածի 5-րդ մասի 29-րդ կետին համապատասխան՝ Լեռնային Ղարաբաղի Հանրապետության կառավարությունը որոշում է.

Հաստատել ջրային համակարգերը ոռոգման, արոտավայրերի ջրարբիացման, հողերի լվացման ու աղազերծման և գյուղատնտեսական այլ նպատակներով օգտագործելու կարգը՝ համաձայն հավելվածի:

1. Սույն կարգով սահմանվում է Լեռնային Ղարաբաղի Հանրապետության տարածքում ջրային համակարգերը ոռոգման, արոտավայրերի ջրարբիացման, հողերի լվացման ու աղազերծման և գյուղատնտեսական այլ նպատակներով օգտագործելու կարգը:

2. Սույն կարգում օգտագործվող հասկացություններն ունեն հետևյալ իմաստները՝

ջրարբիացում` ջրազուրկ, սակավաջուր արոտավայրերում մարդկանց և անասուններին խմելու, կենցաղային և տնտեսական նպատակներով ջրամատակարարում.

լվացում` ավելորդ աղերի լուծման և աղային լուծույթի հետագա հեռացման գործընթաց.

ջրարբիացման համակարգ` գյուղատնտեսական օգտագործման նպատակով /տնտեսական, կենցաղային, արտադրական և այլ նպատակով/ ջուրը ջրաղբյուրներից մինչև սպառման տեղերը /անասնապահական ֆերմա, արոտավայրերում տեղաբաշխված անասունների ջրելակետեր և այլն/ տեղափոխելու, հասցնելու և բաշխելու համար նախատեսված ջրային համակարգ.

դրենաժային համակարգ` գրունտային ջրերի մակարդակն իջեցնող և դրանց հեռացման համար անցկացվող բաց ջրանցքների, փակ ցամաքեցուցիչների, չորացման հորերի և համապատասխան կառուցվածքների համակարգ.

ջրելակետ (ջրելատեղ)` արոտավայրերում կենդանիները ջրելու /խմելու/ համար կահավորված հատուկ կետ /տաշտակներ, ջրման հրապարակ/.

ջրելակետի ջրման շառավիղ` արոտավայրերում առանձին տեղամասերի սահմանային գծից ջրելակետերի տեղադրման հեռավորություն, որը որոշվում է կենդանիների յուրաքանչյուր տեսակի համար սահմանված մեծությունից /ջրման շառավղի նորմա/.

ջրարբիացված արոտավայր` ջրարբիացված է համարվում արոտավայրի այն տեղամասը /տարածքը/, որն ընդգրկված է տեխնիկական նորմերի պահանջներին համապատասխան կահավորված ջրելակետի ջրման շառավղում և որտեղ ապահովված է տվյալ տեղամասից օգտվող կենդանիների կազմի ու թվի ջրի սպառման նորմաներով հաշվարկված ջրի օրական, ժամային քանակը.

ջրի սպառման նորմա` 1 օրվա ընթացքում օգտագործելու համար նախատեսված ջրի քանակ:

3. Ջրային համակարգերը ոռոգման նպատակով օգտագործելու դեպքում կիրառելի է Լեռնային Ղարաբաղի Հանրապետության կառավարության որոշմամբ հաստատված՝ ոռոգման ջրի մատակարարման և օգտագործման կանոններով սահմանված կարգը և ջրային համակարգերի օգտագործման թույլտվությունների պայմանները:

4. Արոտավայրերի ջրարբիացման նպատակով ջրամատակարարումը ջրօգտագործողներին /ջրօգտագործողների ընկերություններ /ՋԸ/, ջրօգտագործողների ընկերությունների միություններ /ՋՄ/, անհատ ջուր սպառողներ /անասնատերեր/ իրականացվում է ջրարբիացման համակարգերը շահագործող, սահմանված կարգով թույլտվություն ստացած իրավաբանական կամ ֆիզիկական անձանց /ջրարբիացման համակարգերը շահագործող անձ/ կողմից՝ պայմանագրային հիմունքներով, ոռոգման ջրի մատակարարման և օգտագործման կանոններով սահմանված կարգով:

5. Արոտավայրերի ջրարբիացման նպատակով ջրի կարգավորվող սակագնի ձևավորումն ու սահմանումը կատարվում է Լեռնային Ղարաբաղի Հանրապետության ջրային օրենսգրքի 79-րդ հոդվածի սկզբունքներով: Սակագինը հիմնավորող հաշվարկներն ու առաջարկությունները լիազոր մարմնի քննարկմանն ու հաստատմանն է ներկայացնում ջրարբիացման համակարգերը շահագործող անձը:

6. Ջրօգտագործման պլանավորման նպատակով ջրօգտագործողը՝

ա/ ջուր սպառողների /անասնատերեր/ կողմից ստացված հայտերի հիման վրա կազմում է ջրային համակարգերից ջրարբիացման նպատակով սպառիչների հաշվառման մատյանը (այսուհետ` մատյան) (N 1՝ ջբ ձևը կցվում է) և ճշտում այն արոտային շրջանն սկսելուց 30 օր առաջ, իսկ ամբողջ տարվա ընթացքում աշխատող օբյեկտների համար՝ մինչև հունվարի 1-ը: Ջրօգրագործողների ընկերությունների և ջրօգտագործողների ընկերությունների միությունների անդամները հայտով ներկայացնում են անասնագլխաքանակը՝ ըստ կենդանիների տեսակների, նշում ջրարբիացված արոտային շրջանի /տարածքի/ անվանումը, տեղը /հանդամասը/, որտեղ պահվելու են անասունները՝ ներառյալ մերձհամայնքային տարածքներում պահվող անասնագլխաքանակը.

բ/ ստուգում է ստացված հայտերի տվյալները /համեմատում է գյուղապետարանի հաշվառման տվյալների հետ/ և ստացված ջրի դիմաց պարտադիր վճարման համար ջուր սպառողի գրավոր երաշխիքի առկայության դեպքում հայտը համարվում է ընդունված: Անհամապատասխանության դեպքում հայտում նշված տվյալները ենթակա են ճշտման.

գ/ ճշտված մատյանի մեկ օրինակը հանձնում է տեղական ինքնակառավարման մարմնին՝ արոտային շրջանում արոտավայրի օգտագործման ցուցակներում և հայտերում արտացոլված անասնագլխաքանակի համապատասխանությունը պարբերաբար ստուգելու, անհրաժեշտության դեպքում համապատասխան ճշտումներ կատարելու համար.

դ/ մատյանների հիման վրա կազմում է ջուր սպառողների վերաբերյալ տեղեկանքը (N 2` ջբ ձևը կցվում է).

ե/ հաշվարկում է արոտավայրերի ջրարբիացման և դրա հետ կապված այլ կարիքների համար ջրի պահանջարկը.

զ/ ջրի պահանջարկի հաշվարկները ջրամատակարար կազմակերպության հետ համաձայնեցնելուց հետո կազմում է ջրարբիացման և ջրօգտագործման ներտնտեսային պլան-ժամանակացույցերը (NN 3՝ ջբ և 4՝ ջբ ձևերը կցվում են)` ըստ ջրարբիացված արոտավայրերի, ջրարբիացման համակարգերի ու հանդամասերի (ջրելակետերի), և ջուր սպառողների վերաբերյալ տեղեկանքի հետ միասին ներկայացնում ջրամատակարարի համաձայնեցմանը:

7. Համաձայնեցված ջրօգտագործման պլանների հիման վրա ջրօգտագործողը ջրամատակարարի հետ կնքում է տվյալ ջրարբիացման համակարգից ջրի մատակարարման-օգտագործման պայմանագիր՝ ջրարբիացված արոտավայրերի համար՝ ոչ ուշ, քան արոտային շրջանն սկսվելուց 15 օր առաջ, իսկ ամբողջ տարվա ընթացքում աշխատող օբյեկտների համար՝ մինչև ընթացիկ տարվա հունվարի 15-ը:

8. Համաձայնեցված ջրօգտագործման պլանների հիման վրա ջրօգտագործողը ջրարբիացման ջրի մատակարարման հայտ ներկայացրած ընկերության անդամ ջուր սպառողների /անասնատերերի/ հետ կնքում է ջրի մատակարարման-ստացման անհատական պայմանագրեր՝ ջրարբիացված արոտավայրերի համար՝ արոտային շրջանն սկսվելուց 15 օր առաջ, իսկ ամբողջ տարվա ընթացքում աշխատող օբյեկտների համար` մինչև ընթացիկ տարվա հունվարի 15-ը:

9. Տարվա ընթացքում անասնագլխաքանակի փոփոխության դեպքում ջուր սպառողները դրա մասին գրավոր հայտնում են սպասարկող ջրօգտագործողին՝ ջրի և վճարման տվյալների համապատասխան ճշտումներ կատարելու համար: Ջրօգտագործողը դրա հիման վրա կատարում է ճշտում և տեղի ունեցած փոփոխության մասին գրավոր ներկայացնում ջրամատակարարին՝ կնքված պայմանագրերում փոփոխություն կատարելու համար:

10. Արոտավայրերի ջրարբիացման համակարգերով իրականացվող ջրառի, ջրօգտագործողներին /ՋԸ, ՋՄ/ մատակարարվող ջրի հաշվառումը, ջրաչափությունն ու հաշվետվությունները կազմում ու ներկայացում է ջրարբիացման համակարգերը շահագործող անձը` ջրամատակարարը, իսկ ջրամատակարարից ստացվող ջրի և սպառողներին մատակարարված ջրի հաշվառումը, ջրաչափությունն ու հաշվետվությունները՝ ջրօգտագործողը:

11. Ջրամատակարար-ջրօգտագործող փոխհարաբերություններում ջրի չափումն ու հանձնում-ընդունումը կատարվում է սպասարկման գոտու սահմանազատման /ջրտուքի/ կետերում, որոնք նշվում են պայմանագրի համապատասխան կետում, իսկ ջրօգտագործող /ՋՄ, ՋԸ/-ջուր սպառող հարաբերությունների համար ջրտուքի կետ է հանդիսանում ջրելակետում ջրի մուտքի ջրաչափման կետը, որի համար ջրօգտագործողը վարում է ամենամսյա գրանցման մատյան:

12. Լեռնային Ղարաբաղի Հանրապետության օրենսդրությամբ սահմանված կարգով շրջակա միջավայրի վրա ազդեցության փորձաքննություն անցած և Լեռնային Ղարաբաղի Հանրապետության կառավարության կողմից հաստատված՝ աղակալված հողերի լվացման ու աղազերծման ծրագրերին համապատասխան կազմվում և հաստատվում է միջոցառումների իրականացման ժամանակացույց՝ ըստ համայնքների ու շրջանների:

13. Ջրօգտագործողները /ՋԸ, ՋՄ/ աղակալված հողերի աղազերծման-լվացման, ինչպես նաև առաջին 3 տարում դրանց գյուղատնտեսական իրացման համար, Լեռնային Ղարաբաղի Հանրապետության կառավարության կողմից հաստատված՝ աղակալված հողերի աղազերծման ու լվացման ծրագրին համապատասխան, կազմում են աղազերծման-լվացման տեխնոլոգիական քարտերով հիմնավորված, լվացման նորմաներով հաշվարկված ամենամյա ջրօգտագործման պլան-ժամանակացույցերը և ներկայացնում համապատասխան ջրամատակարարի համաձայնեցմանը:

14. Ջրօգտագործողները գյուղատնտեսական շրջանառության մեջ գտնվող /գյուղատնտեսական իրացման 4-րդ տարվանից սկսած/ աղազերծված հողերի ոռոգման-լվացման /լվացման նպատակով ոռոգման բարձր նորմաներով ոռոգում/ համար հողերի մելիորատիվ վիճակի մոնիտորինգի /աղային հանույթի/ տվյալներով և ոռոգման-լվացման նորմաներով կազմում են ամենամյա ջրօգտագործման պլան-ժամանակացույցերը և ներկայացնում համապատասխան ջրամատակարարի համաձայնեցմանը:

15. Հողերի աղազերծման-լվացման և ոռոգման-լվացման նպատակով ամենամյա ջրօգտագործման պլան-ժամանակացույցերը կազմվում են երկու փուլով՝ վաղ աշնանը /նախնական/ և վաղ գարնանը /ճշտված/՝ ջրման շրջանն սկսվելուց 20 օր առաջ:

16. Ջրամատակարար կազմակերպությունները ջրօգտագործողներից ստացված ջրօգտագործման պլան-ժամանակացույցերի հիման վրա կազմում են ամփոփ ջրամատակարարման և ջրառի իրականացման համակարգային պլան-ժամանակացույցեր և դրանք ներկայացնում ջրային համակարգերի կառավարման ու ջրային ռեսուրսների կառավարման և պահպանության մարմինների համաձայնեցմանը:

17. Ջրօգտագործողները ջրամատակարար կազմակերպությունների և ընկերության անդամ ջուր սպառողների հետ, համաձայնեցված պլան-ժամանակացույցերին համապատասխան, կնքում են ոռոգման ջրի մատակարարման պայմանագրեր /առանց վճարման պարտավորության/:

18. Ջրային համակարգերով հողերի աղազերծման-լվացման և ոռոգման-լվացման նպատակով ջուրը մատակարարվում և ջրային համակարգով ջրաղբյուրից ջրառ է իրականացվում տվյալ ջրային համակարգին տրված ջրօգտագործման թույլտվության, ջրի և հեռացվող կեղտաջրերում պարունակվող վնասակար նյութերի թույլատրելի սահմանային արտահոսքի չափաքանակների /լիմիտի/ սահմաններում:

19. Ջրային համակարգերից նոր հողերի իրացման և առաջին 3 տարվա ընթացքում գյուղատնտեսական իրացման հետ կապված աղազերծման-լվացման նպատակով մատակարարված ջրի ամբողջ ծավալի, իսկ նախկինում աղազերծված /3 տարվանից ավելի օգտագործվող/ հողերի ոռոգման-լվացման նպատակով մատակարարված ջրի ծավալից ջրման-լվացման և ջրման նորմաների տարբերությամբ հաշվարկված ջրի ծավալի դիմաց ջրօգտագործողը ջրամատակարարին չի վճարում /համաձայն Լեռնային Ղարաբաղի Հանրապետության ջրային օրենսգրքի 26-րդ հոդվածի՝ այդ նպատակով ջուրը մատակարարվում է անվճար/:

20. Ջրամատակարարը ջրային համակարգերով հողերի աղազերծման-լվացման և ոռոգման-լվացման նպատակով իրականացված ջրառի ծավալի համար ազատվում է  ջրօգտագործման վճարից:

21. Ջրային համակարգերով հողերի աղազերծման-լվացման և ոռոգման-լվացման նպատակներով ջրի մատակարարումը, հաշվառումը, հաշվետվությունը, ջրաչափությունն ու ջրի հանձնում-ընդունումն իրականացվում էոռոգման ջրի մատակարարման և օգտագործման կանոններով սահմանված կարգով:

22. Ջրային համակարգերը գյուղատնտեսական այլ նպատակներով օգտագործվում են պայմանագրային հիմունքներով՝ սահմանված կարգերին համապատասխան:

Մ Ա Տ Յ Ա Ն

ՋՐԱՅԻՆ ՀԱՄԱԿԱՐԳԵՐԻՑ ՋՐԱՐԲԻԱՑՄԱՆ ՆՊԱՏԱԿՈՎ ՍՊԱՌողՆԵՐԻ ՀԱՇՎԱՌՄԱՆ

Տ Ե Ղ Ե Կ Ա Ն Ք

                                                                               /ջրտուրքը ջրի սպառման կետում/

/ջրառի ներտնտեսային բաժանարարի, ցանցի գլխամասում ջրտուքի կետում/