ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

    Լեռնային Ղարաբաղի Հանրապետության հողային օրենսգրքի 34-րդ հոդվածի 3-րդ և 118-րդ հոդվածի 9-րդ կետերին համապատասխան` Լեռնային Ղարաբաղի Հանրապետության կառավարությունը որոշում է.

1. Հաստատել Լեռնային Ղարաբաղի Հանրապետության հողային հաշվեկշիռը կազմելու կարգը /կցվում է/:

2. Սահմանել, որ հողերի պետական հաշվառման, Լեռնային Ղարաբաղի Հանրապետության հողային հաշվեկշիռը կազմելու, ինչպես նաև համայնքների ու շրջանների վարչական տարածքներում գտնվող հողերի հաշվառման մատյանների ձևերի և լրացման կարգի վերաբերյալ նորմատիվ գերատեսչական ակտերն ընդունում է Լեռնային Ղարաբաղի Հանրապետության անշարժ գույքի կադաստրի պետական կոմիտեն՝ համաձայնեցնելով Լեռնային Ղարաբաղի Հանրապետության գյուղատնտեսության նախարարության, ԼՂՀ արտադրական ենթակառուցվածքների զարգացման և քաղաքաշինության նախարարության, ԼՂՀ կրթության, մշակույթի և սպորտի նախարարության, Լեռնային Ղարաբաղի Հանրապետության շրջակա միջավայրի և բնական ռեսուրսների վարչության ու ԼՂՀ ազգային վիճակագրական ծառայության հետ:

3. Սույն որոշումն ուժի մեջ է մտնում 2005 թվականի հունվարի 1-ից:

4. Սույն որոշումն ուժի մեջ մտնելու պահից ուժը կորցրած ճանաչել ԼՂՀ կառավարության 2001թ. դեկտեմբերի 25-ի «ԼՂՀ հողային հաշվեկշիռը կազմելու մասին» թիվ 318 որոշումը:

Կ Ա Ր Գ

1. Սույն կարգով սահմանվում է Լեռնային Ղարաբաղի Հանրապետության հողային ֆոնդի առկայության և բաշխման մասին հաշվետվությունը /այսուհետև՝ հողային հաշվեկշիռ/ կազմելու կարգը:

2. Հողային հաշվեկշիռը հողերի ընթացիկ հաշվառման հիման վրա կազմվող յուրաքանչյուր տարվա հողային ֆոնդի առկայության և բաշխման մասին հաշվետվությունն է:

3. Հողային հաշվեկշիռը բաղկացած է տեքստից և աղյուսակներից: Հողային հաշվեկշռում արտացոլվում է հողային ֆոնդն ըստ նպատակային նշանակության, հողատեսքերի ու գործառնական նշանակության, սեփականության սուբյեկտների, սեփականության և օգտագործման ձևերի՝ արտահայտված հողամասի մակերեսի ճշտությամբ:

4. Յուրաքանչյուր տարվա հողային հաշվեկշռում արտացոլվում են Լեռնային Ղարաբաղի Հանրապետության օրենսդրությամբ սահմանված կարգով կատարված հետևյալ փոփոխությունները՝

ա/ հողի սեփականության ձևի,

բ/ հողի օգտագործման ձևի,

գ/ հողի նպատակային նշանակության,

դ/ հողատեսքերի և դրանց գործառնական նշանակության,

ե/ հողերի իրացման, բարելավման, հողատեսքերի, բազմամյա տնկարկների հիմնման և քանդման,

զ/ ոռոգելի, անջրդի, անօգտագործելի և չորացված հողերի վիճակի, պետական սեփականություն հանդիսացող հողերի շարժի և փոխակերպման/տրանսֆորմացիա/,

է/ նոր անտառատնկումների և անտառահատումների,

ը/ Լեռնային Ղարաբաղի Հանրապետության օրենսդրությամբ սահմանված կարգով պետական սեփականություն հանդիսացող հողերի օտարման, օգտագործման և վարձակալության իրավունքով տրամադրման տվյալների:

5. Յուրաքանչյուր տարվա հողային հաշվեկշռում ընդգրկվում են նաև Լեռնային Ղարաբաղի Հանրապետության օրենսդրությամբ սահմանված կարգով իրականացված հողերի գույքագրման տվյալները, ինչպես նաև առաջին պետական գրանցման նպատակով կադաստրային քարտեզագրումն ավարտված տարածքներում և ենթատարածքներում իրականացված կադաստրային քարտեզագրման տվյալները, որոնք Լեռնային Ղարաբաղի Հանրապետության օրենսդրությամբ սահմանված կարգով տրամադրվում են համայնքներին ու շրջանների վարչակազմերի ղեկավարներին/Ստեփանակերտում՝ Ստեփանակերտի քաղաքապետին/ ընթացիկ հաշվառում իրականացնելու համար: Հողային հաշվեկշռում ընդգրկվում են նաև ընթացիկ տարում Լեռնային Ղարաբաղի Հանրապետության օրենսդրությամբ սահմանված կարգով հաստատված բնակավայրերի գլխավոր հատակագծերի և համայնքների հողերի օգտագործման սխեմաներով նախատեսված հողահատկացումները: Հողերի ընթացիկ հաշվառման արդյունավետությունը բարձրացնելու, տվյալների արժանահավատությունն ապահովելու, հողային ֆոնդի հաշվառման տվյալները լիարժեք դարձնելու նպատակով հողի նպատակային, գործառնական նշանակությունը փոխելու, հողատեսքերի փոփոխության և սույն կարգի 4-րդ կետում նշված աշխատանքների կատարումից հետո Լեռնային Ղարաբաղի Հանրապետության օրենսդրությամբ սահմանված կարգով բազմաբնույթ կադաստր վարող մարմինները 30-օրյա ժամկետում տեղեկատվություն են ներկայացնում համապատասխան համայնքի ղեկավարին, շրջանի վարչակազմի ղեկավարին և Լեռնային Ղարաբաղի Հանրապետության անշարժ գույքի կադաստրի պետական կոմիտե:

6. Հողային հաշվեկշիռը կազմվում է ըստ վարչատարածքային բաժանման՝ համայնք, շրջան, հանրապետություն, որը համապատասխանում է կադաստրային տարածք, ենթատարածք, Լեռնային Ղարաբաղի Հանրապետության տարածք բաժանմանը:

7. Յուրաքանչյուր տարվա հողային հաշվեկշիռը կազմվում է հողերի պետական հաշվառման տվյալ տարվա ընթացիկ տվյալների հիման վրա՝ հուլիսի 1-ի դրությամբ:

8. Լեռնային Ղարաբաղի Հանրապետության շրջակա միջավայրի և բնական ռեսուրսների վարչությունը՝ հատուկ պահպանվող տարածքների և անտառային ֆոնդի հողերի, Լեռնային Ղարաբաղի Հանրապետության գյուղատնտեսության նախարարությունը՝ սույն կարգի 4-րդ կետում նշված փոփոխությունների դեպքում հաշվառման տվյալները յուրաքանչյուր տարվա մինչև հունիսի 1-ը ըստ հողերի գտնվելու վայրի, ներկայացնում են համապատասխան համայնքի ղեկավարին, շրջանի վարչակազմի ղեկավարին/ Ստեփանակերտում՝ Ստեփանակերտի քաղաքապետին/:

9. Համայնքի ղեկավարը /Ստեփանակերտում` Ստեփանակերտի քաղաքապետը/ կազմում է համայնքի հողային հաշվեկշիռը, այն համաձայնեցնում է համայնքի ավագանու և Լեռնային Ղարաբաղի Հանրապետության անշարժ գույքի կադաստրի պետական կոմիտեի տարածքային ստորաբաժանման հետ և ոչ ուշ, քան մինչև յուրաքանչյուր տարվա հուլիսի 10-ը ներկայացնում համապատասխան շրջանի վարչակազմի ղեկավարին:

10. Շրջանի վարչակազմի ղեկավարը /Ստեփանակերտում՝ Ստեփանակերտի քաղաքապետը/ ամփոփում է համայնքների ներկայացրած հողային հաշվեկշիռները՝ ընդգրկելով նաև համայնքների վարչական սահմաններից դուրս գտնվող շրջանի վարչական սահմաններում առկա հողերը, կազմում է շրջանի /Ստեփանակերտ քաղաքի/ հողային հաշվեկշիռը՝ համաձայնեցնելով Լեռնային Ղարաբաղի Հանրապետության գյուղատնտեսության նախարարության հետ, և ոչ ուշ, քան մինչև յուրաքանչյուր տարվա օգոստոսի 1-ը ներկայացնում Լեռնային Ղարաբաղի Հանրապետության անշարժ գույքի կադաստրի պետական կոմիտե:

11. Լեռնային Ղարաբաղի Հանրապետության անշարժ գույքի կադաստրի պետական կոմիտեն ամփոփում է ԼՂՀ շրջանների վարչակազմերի ղեկավարների ներկայացրած հողային հաշվեկշիռները, կազմում Լեռնային Ղարաբաղի Հանրապետության հողային հաշվեկշիռը և այն Լեռնային Ղարաբաղի Հանրապետության գյուղատնտեսության նախարարության, ԼՂՀ արտադրական ենթակառուցվածքների զարգացման և քաղաքաշինության նախարարության, ԼՂՀ կրթության, մշակույթի և սպորտի նախարարության, Լեռնային Ղարաբաղի Հանրապետության շրջակա միջավայրի և բնական ռեսուրսների վարչության հետ սահմանված կարգով համաձայնեցնելուց հետո, ոչ ուշ, քան մինչև յուրաքանչյուր տարվա սեպտեմբերի 1-ը ներկայացնում է Լեռնային Ղարաբաղի Հանրապետության կառավարություն:

12. Լեռնային Ղարաբաղի Հանրապետության կառավարության կողմից Լեռնային Ղարաբաղի Հանրապետության հողային հաշվեկշիռը հաստատվելուց հետո համայնքների ղեկավարները, շրջանների վարչակազմերի ղեկավարները, (Ստեփանակերտում՝ Ստեփանակերտի քաղաքապետը) հողերի հաշվառման համապատասխան գրքերում լրացնում են հաստատված տվյալները:

13. Հողերի հաշվառման գրքերը նշված մարմիններին տրամադրում է Լեռնային Ղարաբաղի Հանրապետության անշարժ գույքի կադաստրի պետական կոմիտեն: