ք. Ստեփանակերտ

Հիմք ընդունելով Լեռնային Ղարաբաղի Հանրապետության հողային օրենսգրքի 64-րդ հոդվածի 1-ին կետի 4.1-ին ենթակետի դրույթները՝ Արցախի Հանրապետության կառավարությունը ո ր ո շ ու մ  է.

1. Սահմանել բազմամյա տնկարկների մշակության նպատակով վարձակալած հողերում ոռոգման կաթիլային համակարգով կահավորված այգի հիմնադրած Արցախի Հանրապետության քաղաքացիներին և իրավաբանական անձանց պետության և համայնքների սեփականության հողամասերի սեփականության իրավունքով անհատույց տրամադրման կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող տասներորդ օրը:

1. Սույն կարգով կանոնակարգվում են պետության և համայնքային սեփականություն հանդիսացող, Արցախի Հանրապետության քաղաքացիներին և իրավաբանական անձանց բազմամյա տնկարկների մշակության նպատակով վարձակալության հանձնված և ոռոգման կաթիլային համակարգով կահավորված այգիներով զբաղեցված գյուղատնտեսական նշանակության հողերի Արցախի Հանրապետության քաղաքացիներին և իրավաբանական անձանց սեփականության իրավունքով անհատույց տրամադրման հետ կապված հարաբերությունները:

2. Սույն կարգի իմաստով օգտագործվող հիմնական հասկացություններն են՝

1) արտադրական նշանակության այգի՝ նվազագույնը 1 հեկտար մակերեսով, տունկը կատարված, ոռոգման ջրով ապահովված և ոռոգման կաթիլային համակարգով կահավորված գյուղատնտեսական նշանակության հողատարածք.

2) ենթահողային ոռոգման համակարգ՝ ցածր ճնշումային ոռոգման համակարգ, որը բաղկացած է գլխավոր, բաժանարար, դաշտային և ջրման խողովակաշարերից, գլխավոր և բաժանարար խողովակաշարերը տեղադրված են հողի մակերեսից 0,8 մետր խորության վրա և ջուրը տեղափոխում են ոռոգման աղբյուրից մինչև ջրվող տարածք, խողովակների տրամագծերը որոշվում են հիդրավլիկական և տեխնիկատնտեսական հաշվարկներով, ջրման խողովակները խոնավությունը բաց են թողնում իրենց ամբողջ պատերով, և տեղադրվելով գրունտում դրանք զերծ են մնում դրսի միջավայրի տարբեր ազդեցություններից.

3) հիդրանտներով ոռոգում՝ ջրման փականներով շարժական խողովակաշարով ոռոգում, խողովակաշարի փականների դիրքն ուղղահայաց է, իսկ խողովակն անցնում է հողի տակով, ջրի ելքը կարգավորվում է փականի բացվածքի չափով.

4) ոռոգման կաթիլային համակարգ՝ ցածր ճնշումային ոռոգման համակարգ, որը բաղկացած է գլխավոր, բաժանարար, դաշտային և ջրման խողովակաշարերից, գլխավոր և բաժանարար խողովակաշարերը ջուրը տեղափոխում են ոռոգման աղբյուրից մինչև ջրվող տարածք, խողովակների տրամագծերը որոշվում են հիդրավլիկական և տեխնիկատնտեսական հաշվարկներով, ջրման խողովակաշարերի վրա տեղադրում են կաթոցիկներ, որի բաղկացուցիչ մասն է կազմում ճնշման և ջրի ծախսի կարգավորիչ թաղանթը:

3. Սույն կարգի իմաստով ոռոգման կաթիլային համակարգով կահավորված այգիներին հավասարեցվում են նաև ոռոգման ենթահողային համակարգով կահավորված կամ հիդրանտներով ոռոգվող (միասին այսուհետ՝ ոռոգման կաթիլային համակարգ) այգիները:

4. Արցախի Հանրապետության քաղաքացիները և իրավաբանական անձինք կարող են անհատույց սեփականության իրավունքով ձեռք բերել պետական կամ համայնքային սեփականություն հանդիսացող հողամասերը միայն արտադրական նշանակության այգի հիմնադրելու դեպքում:

5. (կետն ուժը կորցրել է 20.12.21 N1389-Ն)

6. Պետության սեփականություն հանդիսացող հողամասերի սեփականության իրավունքով անհատույց տրամադրումն իրականացվում է Լեռնային Ղարաբաղի Հանրապետության հողային օրենսգրքով, սույն կարգով և այլ իրավական ակտերով սահմանված կարգով` Արցախի Հանրապետության համապատասխան շրջանի վարչակազմի, իսկ Ստեփանակերտ քաղաքում՝ Ստեփանակերտի քաղաքապետի որոշմամբ:

7. Համայնքային սեփականություն հանդիսացող հողամասերի սեփականության իրավունքով անհատույց տրամադրումն իրականացվում է Լեռնային Ղարաբաղի Հանրապետության հողային օրենսգրքով, սույն կարգով և այլ իրավական ակտերով սահմանված կարգով՝ համայնքի ղեկավարի կողմից՝ համայնքի ավագանու համաձայնությամբ և սահմանած պայմաններով:

8. Պետության կամ համայնքային սեփականություն հանդիսացող հողամասում ոռոգման կաթիլային համակարգով կահավորված այգի հիմնած Արցախի Հանրապետության քաղաքացիները և իրավաբանական անձինք հողի նկատմամբ սեփականության իրավունք ձեռք բերելու նպատակով հայտ են ներկայացնում (համաձայն ձևի) ՝

1) համայնքի վարչական սահմաններից դուրս գտնվող հողամասերի մասով՝ համապատասխան շրջանի վարչակազմի ղեկավարին.

2) համայնքի վարչական սահմաններում գտնվող հողամասերի մասով՝ համապատասխան համայնքի ղեկավարին (Ստեփանակերտ քաղաքում՝ Ստեփանակերտի քաղաքապետին):

9. Արցախի Հանրապետության քաղաքացիները և իրավաբանական անձինք հայտերը կարող են ներկայացնել միայն ոռոգման կաթիլային համակարգերը տեղադրելուց, տունկը կատարելուց և հողերի գործառնական նշանակությունը փոխելուց հետո:

10. Սույն կարգի 8-րդ կետում նշված տարածքային կառավարման և տեղական ինքնակառավարման մարմինները ստացած հայտերը երեք աշխատանքային օրվա ընթացքում ուղարկում են Արցախի Հանրապետության էկոնոմիկայի և գյուղատնտեսության նախարարություն (այսուհետ՝ նախարարություն):

(10-րդ կետը լրաց. 20.12.21 N1389-Ն)

11. Արցախի Հանրապետության էկոնոմիկայի և գյուղատնտեսության նախարարի հրամանով ստեղծվում է հանձնաժողով՝ հայտատուների կողմից վարձակալած հողատարածքում հիմնադրված այգում ոռոգման կաթիլային համակարգի և տունկը կատարված լինելու հանգամանքի առկայությունը պարզելու նպատակով:

(11-րդ կետը լրաց. 20.12.21 N1389-Ն)

12. Հանձնաժողովը տասնօրյա ժամկետում ստուգում է գյուղատնտեսական նշանակության հողատարածքի մակերեսը, մշակվող բազմամյա տնկարկի տեսակը, ոռոգման կաթիլային համակարգի առկայությունը և Արցախի Հանրապետության էկոնոմիկայի և գյուղատնտեսության նախարարին է ներկայացնում եզրակացություն՝ հիմնադրված այգու վերաբերյալ:

(12-րդ կետը լրաց. 20.12.21 N1389-Ն)

13. Հանձնաժողովի դրական եզրակացության դեպքում նախարարությունը ստացած հայտերը և եզրակացությունն ուղարկում է համապատասխան համայնքի ղեկավարին կամ վարչակազմի ղեկավարին՝ հողամասի անհատույց սեփականության իրավունքով տրամադրման գործընթացն ապահովելու նպատակով:

14. Պետության և համայնքային սեփականություն հանդիսացող հողամասերի նվիրատվության պայմանագրերում նշվում են նաև գյուղատնտեսական նշանակության հողերի օգտագործման այլ պայմաններ և սահմանափակումներ:

15. Պետության և համայնքային սեփականություն հանդիսացող հողամասերի նվիրատվության պայմանագրերում ամրագրվում են նաև նվիրատվության կարգով տրամադրված հողամասերի նկատմամբ տնօրինման իրավունքի հետագայում օտարերկրյա քաղաքացիներին փոխանցման անթույլատրելիության վերաբերյալ դրույթներ:

16. (կետն ուժը կորցրել է 20.12.21 N1389-Ն)

4. ՆՎԻՐԱՏՎՈՒԹՅԱՄԲ ՏՐԱՄԱԴՐՎԱԾ ՀՈՂԱՄԱՍԵՐԻ ՕԳՏԱԳՈՐԾՄԱՆ ԱՌԱՆՁՆԱՀԱՏԿՈՒԹՅՈՒՆՆԵՐԸ

17. Նվիրատվությամբ տրամադրված հողամասերն օգտագործվում են իրավական ակտերով, քաղաքաշինական ու հողաշինական փաստաթղթերով սահմանված և պայմանագրերում նշված նպատակային ու գործառնական նշանակությանը համապատասխան:

18. Արգելվում է նվիրատվությամբ տրամադրված բազմամյա տնկարկ հողատեսքի գյուղատնտեսական նշանակության հողերի փոխադրումն այլ նպատակային և գործառնական նշանակության հողերի, բացառությամբ օրենսդրությամբ սահմանված կարգով հատուկ նշանակության կամ հատուկ պահպանվող տարածքների հողերի:

19. Սույն կարգով նախատեսված հողամասերը սեփականության իրավունքով անհատույց ձեռք բերելուց հետո հողամասի առուվաճառքի, նվիրատվության, փոխանակման կամ իրավաբանական անձանց լուծարումից հետո նրա հիմնադիրներին (մասնակիցներին) հանձնման, այդ թվում` պարտատերերի պահանջների բավարարման կամ բռնագանձման հետևանքով հողամասի սեփականատիրոջ փոփոխության դեպքում, անկախ այն հանգամանքից, թե հողամասը ձեռք է բերվում հատուցմամբ կամ անհատույց, ձեռք բերողը համապատասխանաբար պետական կամ համայնքային բյուջե պետք է վճարի հողամասի տվյալ պահին գործող կադաստրային արժեքը:

20. Սույն կարգի 19-րդ կետով նախատեսված դեպքերում իրավունքների պետական գրանցումը մերժվում է, եթե ձեռք բերողը չի ներկայացնում հողամասի տվյալ պահին գործող կադաստրային արժեքի վճարման անդորրագիրը: Կադաստրային արժեքը վճարելու պահանջը չի տարածվում պետությանը կամ համայնքին օտարվող հողամասերի վրա:

(Հավելվածը փոփ., լրաց. 20.12.21 N1389-Ն)

Դիմող   ______________________________________________________________________________

                                                    (ազգանունը, անունը, հայրանունը, (անվանումը))

Բնակության հասցեն (գտնվելու վայրը )______________________________________________

հեռախոսահամարը _____________________________________________________________

ՀՎՀՀ __________________________________________________________________________________

Անձնագրի համարը _____________________________________________________________

Վարձակալած պետական կամ համայնքային

սեփականություն (ընդգծել) հանդիսացող

հողամասի հասցեն ______________________________________________________________

Մշակվող հողամասի մակերեսը ____________________________________________________

Մշակվող բազմամյա տնկարկի տեսակը______________________________________________

Հայտնում եմ Ձեզ այն մասին, որ իմ կողմից վարձակալած հողամասում հիմնել եմ ոռոգման կաթիլային կամ ենթահողային համակարգով կահավորված կամ հիդրանտներով ոռոգվող (ընդգծել) այգի և միաժամանակ խնդրում եմ տվյալ հողամասն անհատույց սեփականության իրավունքով տրամադրել ինձ:

Լրացուցիչ տեղեկություններ_______________________________________________________

_____________________________________________________________________________

_____________________________________________________________________________

«____» ______________ 20___ թ.