Ղեկավարվելով Արցախի Հանրապետության ընտրական օրենսգրքի 60-րդ հոդվածի 5-րդ մասով, 69-րդ հոդվածի 2-րդ մասի 1-ին կետով և 7-րդ մասով, 72-րդ հոդվածի 7-րդ և 9-րդ մասերով` Արցախի Հանրապետության կենտրոնական ընտրական հանձնաժողովը որոշում է.

1. Սահմանել տեղամասային ընտրական հանձնաժողովի կողմից ընտրական փաստաթղթերն ու պարագաները փաթեթավորելու և տարածքային ընտրական հանձնաժողով ներկայացնելու կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

1. Սույն կարգով կարգավորվում են տեղամասային ընտրական հանձնաժողովի կողմից ընտրական փաստաթղթերն ու պարագաները քվեարկության ավարտից հետո փաթեթավորելու և տարածքային ընտրական հանձնաժողով ներկայացնելու հետ կապված հարաբերությունները:

2. Առանձին փաթեթավորվում և ընտրական փաստաթղթերի ընդհանուր փաթեթում (կամ մեկանգամյա օգտագործման պարկում, այսուհետ՝ ընդհանուր փաթեթ) տեղադրվում են՝

1) չօգտագործված (մարված), ընտրողների կողմից ոչ ճիշտ լրացված (վնասված) և հետ տրված քվեաթերթիկների փաթեթը,

2) համապետական ընտրությունների ժամանակ` միայն զորամասում, ազգային անվտանգության ծառայությունում, ոստիկանության զորքերում և քրեակատարողական հիմնարկում կազմված ընտրողների ստորագրված ցուցակները,

3) յուրաքանչյուր թեկնածուին, կուսակցությանը (կուսակցությունների դաշինքին) կողմ, իսկ մեկ թեկնածու քվեարկվելու դեպքում՝ նաև դեմ քվեարկված՝ հաշվարկված և տեսակավորված քվեաթերթիկները,

4) անվավեր քվեաթերթիկները,

5) քվեարկության արդյունքների արձանագրության մեկ օրինակը:

3. Տարածքային ընտրական հանձնաժողովում հետագայում սկանավորելու նպատակով համապետական ընտրությունների դեպքում քվեարկությանը մասնակցած ընտրողների ցուցակները (բացառությամբ զորամասում և քրեակատարողական հիմնարկում կազմվող՝ ընտրողների ստորագրված ցուցակների) փաթեթավորվում են, փաթեթը կնքվում և ստորագրվում է տեղամասային ընտրական հանձնաժողովի նախագահի կողմից և տեղադրվում է առանձին փաթեթում (այսուհետ՝ փոքր պարկ):

4. Համապետական ընտրություններին մասնակցող յուրաքանչյուր թեկնածուին, կուսակցությանը (կուսակցությունների դաշինքին) կողմ քվեարկած քվեաթերթիկները փաթեթավորվում են միասին՝ առանձին փաթեթում:

Համայնքի ղեկավարի և ավագանու անդամի ընտրությունների ժամանակ մեկ թեկնածու քվեարկվելու դեպքում` թեկնածուին դեմ քվեարկված քվեաթերթիկները տեղադրվում են առանձին փաթեթում:

5. Ընդհանուր փաթեթում տեղադրվող ընտրական փաստաթղթերի փաթեթավորումն իրականացվում է համապատասխան փաստաթղթերն առանձին ծրարներում տեղադրելու և ծրարներից յուրաքանչյուրի վրա դրա պարունակության վերաբերյալ նշում կատարելու միջոցով: Ծրարները փակման մասում սոսնձվում են և կնքվում տեղամասային ընտրական հանձնաժողովի կնիքով: Ծրարների վրա պետք է առկա լինի տեղամասային ընտրական հանձնաժողովի նախագահի ստորագրությունը: Հանձնաժողովի մյուս անդամները և վստահված անձինք ևս իրավունք ունեն ստորագրելու ծրարների վրա: Տեղամասային ընտրական հանձնաժողովի գրանցամատյանում գրառվում են ստորագրողների անունները, ազգանունները, դրվում նրանց ստորագրության նմուշները:

6. Ընտրական փաստաթղթերի մեկանգամյա օգտագործման պարկը և ընտրողների ցուցակները պարունակող պարկը փակվում են փակման համար նախատեսված տեղի ժապավենը հեռացնելու, այդ մասում պարկի երկու կողմերն իրար միացնելու և այդ միացման տեղում պարկի երկու կողմերն իրար ամուր սեղմելու միջոցով: Սույն դրույթը կիրառելի է մեկանգամյա օգտագործման պարկից օգտվելու հնարավորության դեպքում:

7. Ընդհանուր փաթեթի և փոքր պարկի վրա ստորագրում է հանձնաժողովի նախագահը, կնքվում են տեղամասային ընտրական հանձնաժողովի կնիքով և ընդհանուր փաթեթի և փոքր պարկի վրա գրվում է ընտրական տեղամասի համարը: Հանձնաժողովի մյուս անդամները և վստահված անձինք ևս իրավունք ունեն ստորագրելու ընդհանուր փաթեթի և փոքր պարկի վրա: Գրանցամատյանում գրառվում են ստորագրողների անունները, ազգանունները, դրվում ստորագրության նմուշները:

8. Ընտրական փաստաթղթերի ընդհանուր փաթեթը, ընտրողների ցուցակները պարունակող փոքր պարկը, քվեարկության արդյունքների արձանագրության երկու օրինակը, տեղամասային ընտրական հանձնաժողովի գրանցամատյանը, կնիքը, տեղամասային ընտրական հանձնաժողովի նախագահը և քարտուղարը քվեարկության ավարտից հետո՝ ոչ ուշ, քան 12 ժամվա ընթացքում ներկայացնում են տարածքային ընտրական հանձնաժողով (հնարավորության դեպքում՝ ոստիկանության ծառայողների ուղեկցությամբ):

Միաժամանակ տարածքային ընտրական հանձնաժողով են տեղափոխվում նաև քվեատուփերը (առկայության դեպքում՝ շրջիկ արկղերը), քվեարկության խցիկները:

9. Տարածքային ընտրական հանձնաժողովը համեմատում է կնիքի համարը տեղամասային ընտրական հանձնաժողովի արձանագրության կնիքի համարի հետ, ընդունում կնիքը՝ կատարելով դրա քանակական հաշվառում:

Կազմավորված բոլոր ընտրական տեղամասերից կնիքներն ստանալուց հետո տարածքային ընտրական հանձնաժողովը դրանք փաթեթավորում է, փաթեթի վրա նշում առկա կնիքների քանակը և փաթեթը կնքում:

Կնիքները Կենտրոնական ընտրական հանձնաժողով են տեղափոխվում քվեարկության ավարտից հետո՝ ընտրական փաստաթղթերի ընդհանուր փաթեթի հետ միաժամանակ, տարածքային ընտրական հանձնաժողովների միջոցով:

Կնիքները Կենտրոնական ընտրական հանձնաժողովում ստուգվում են և հաշվառվում:

10. Ընտրական փաստաթղթերը տարածքային ընտրական հանձնաժողովում հանձնվում և ընդունվում են հանձնողի ու ընդունողի կողմից ստորագրելու և ստացական տալու միջոցով:

Ստացականը կնքում է տարածքային ընտրական հանձնաժողովի նախագահը: Ստացականի երկրորդ մասը տրվում է տեղամասային ընտրական հանձնաժողովի նախագահին: