ԱՐՑԱԽԻ ՀԱՆՐԱՊԵՏՈՒԹՅՈՒՆ

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎ

2020 թվականի հունվարի 16-ի

ԱՐՑԱԽԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎՈՒՄ

 ԳՈՐԾԱՎԱՐՈՒԹՅԱՆ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ

N 33-Ն

Ո Ր Ո Շ ՈՒ Մ

Ղեկավարվելով Արցախի Հանրապետության ընտրական օրենսգրքի 51-րդ հոդվածի 2-րդ մասի 7-րդ կետով` Արցախի Հանրապետության կենտրոնական ընտրական հանձնաժողովը որոշում է.

1. Հաստատել Արցախի Հանրապետության կենտրոնական ընտրական հանձնաժողովում գործավարության կանոնակարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

ԿԱՆՈՆԱԿԱՐԳ

ԱՐՑԱԽԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԸՆՏՐԱԿԱՆ

ՀԱՆՁՆԱԺՈՂՈՎՈՒՄ ԳՈՐԾԱՎԱՐՈՒԹՅԱՆ

1. ԸՆԴՀԱՆՈՒՐ ԴՐՈՒՅԹՆԵՐ

1. Սույն կանոնակարգով սահմանվում է Արցախի Հանրապետության կենտրոնական ընտրական հանձնաժողովում (այսուհետ` Հանձնաժողով) գործավարության կանոնները:

2. Հանձնաժողովի գործավարությունն իրականացնում է Հանձնաժողովի գործավարության համար պատասխանատու աշխատողը (այսուհետ` Մասնագետ) սույն կանոնակարգին համապատասխան:

3. Հանձնաժողովում գործավարության միասնական կարգի ապահովման վերահսկողությունն իրականացնում է Հանձնաժողովի քարտուղարը:

4. Հանձնաժողովի աշխատողները պատասխանատու են սույն կանոնակարգով նախատեսված գործավարության կանոնների պահպանման համար:

5. Գաղտնի փաստաթղթերի գործավարությունն իրականացվում է «Պետական և ծառայողական գաղտնիքի մասին» օրենքի պահանջներին համապատասխան:

2. ՀԱՆՁՆԱԺՈՂՈՎՈՒՄ ՍՏԱՑՎԱԾ ՓԱՍՏԱԹՂԹԵՐԻ

ԸՆԴՈՒՆՈՒՄԸ, ԳՐԱՆՑՈՒՄՆ ՈՒ ՇԱՐԺԸ

6. Հանձնաժողովում ստացված փաստաթղթերն ընդունում և գրանցում է Մասնագետը` համապատասխան գրանցամատյաններում:

7. Հանձնաժողովում փաստաթղթերը կարող են ստացվել առձեռն կամ փոստի միջոցով: Հանձնաժողովում յուրաքանչյուր մտից փաստաթուղթ գրանցվում է ստացվելու օրը:

8. Մասնագետը բացում է ստացված բոլոր ծրարները (նաև էլեկտրոնային), բացառությամբ «Անձամբ» մակագրությամբ ծրարների:

«Անձամբ» մակագրությամբ ծրարների վրա դրվում է մուտքագրման դրոշմակնիք, նշվում է միայն մուտքի օրը, ամիսը, տարեթիվը (այսուհետ` ամսաթիվ) և փակ վիճակում հանձնվում հասցեատերերին:

9. Մասնագետը ստուգում է ծրարների ամբողջականությունը և դրանում առկա փաստաթղթերի առկայությունը:

Ծրարում փաստաթղթերի բացակայության կամ ոչ լիարժեքության, իսկ էլեկտրոնային փաստաթղթերի դեպքում վնասված լինելու մասին կազմվում է արձանագրություն` երկու օրինակից, որոնցից մեկը կցվում է փաստաթղթին, մյուսն ուղարկվում է փաստաթուղթն ուղարկողին:

10. Այլ հասցեատիրոջ ուղղված փաստաթղթեր ստացվելու դեպքում, դրանք վերահասցեագրվում են ճիշտ հասցեատիրոջը:

11. Փաստաթղթերի ծրարները փակցվում են փաստաթղթերին և պահպանվում դրանց հետ:

12. Մուտքագրված փաստաթղթի առաջին էջի ներքևի աջ անկյունում դրվում է մուտքագրման դրոշմակնիքը, որի վրա նշվում է գրանցման մտից համարը և ամսաթիվը: Դրոշմակնիքը դրվում է այնպես, որ չաղավաղվի փաստաթղթի գրառումը։ Փաստաթղթի աջ անկյունում դրոշմակնքելու անհնարինության դեպքում դրոշմակնիքը դրվում է փաստաթղթի ազատ մասում:

13. Արցախի Հանրապետության նախագահի աշխատակազմից, Արցախի Հանրապետության Ազգային ժողովից, Արցախի Հանրապետության կառավարությունից ստացված փաստաթղթերը և «Շտապ» կատարման նշումն ունեցող փաստաթղթերը գրանցվում և ներկայացվում են Հանձնաժողովի նախագահին անհապաղ:

14. Փաստաթղթերի կատարմանը վերաբերող ցուցումներն իրավասու անձի կողմից տրվում են մակագրությունների ձևով, որոնցում նշվում են կատարողը (կատարողները), աշխատանքի բովանդակությունը, կատարման ժամկետը:

15. Եթե փաստաթուղթը միաժամանակ մակագրվում է մեկից ավելի կատարողների, ապա փաստաթուղթը Մասնագետի կողմից բազմացվում և հանձնվում է կատարողներին:

16. Փաստաթղթի բնօրինակը հանձնվում է այն կատարողին, որի անվան դիմաց նշվել է «Հավաքե բառը, որն էլ համարվում է պատասխանատու կատարող:

17. «Ի գիտություն» և «Ի տնօրինություն» մակագրության դեպքում` փաստաթուղթը հանձնվում է հասցեատիրոջը և կարող է պահպանվել վերջինիս մոտ:

18. Ստացված փաստաթղթի պատասխանը ստորագրվելուց հետո բնօրինակը և պատասխան գրությունը հանձնվում է Մասնագետին:

19. Հանձնաժողովի աշխատողները պատասխանատու են իրենց մոտ գտնվող փաստաթղթերի բնօրինակների պահպանության համար: Արգելվում է ստացված փաստաթղթի բնօրինակում որևէ նշում կամ փոփոխություն կատարելը:

20. Արձակուրդի, գործուղման կամ այլ պատճառներով բացակայելու դեպքում աշխատողը պարտավոր է իր մոտ գտնվող և չպատասխանված փաստաթղթերը հանձնել փոխարինողին կամ անմիջական ղեկավարին:

3. ԵԼԻՑ ՓԱՍՏԱԹՂԹԵՐԻ ՁԵՎԱԿԵՐՊՈՒՄԸ

21. Ելից փաստաթղթերն ստորագրվում են Հանձնաժողովի նախագահի կողմից, իսկ նրա բացակայության դեպքում` Հանձնաժողովի նախագահի տեղակալի կողմից:

Ելից փաստաթղթեր կարող է ստորագրվել նաև Հանձնաժողովի քարտուղարի կողմից` Արցախի Հանրապետության ընտրական օրենսգրքով սահմանված դեպքերում:

22. Բոլոր փաստաթղթերն առաքվում են Մասնագետի միջոցով։ Դրանք գրանցվում են համապատասխան ելքի գրանցամատյաններում:

Ելից գրանցամատյաններում գրառումները կատարվում են փաստաթղթերի առաքման հաջորդականությամբ:

Ելից գրանցամատյաններում տեղեկությունները գրառվում են ելից համարների աճողական հաջորդակությանը համապատասխան:

23. Յուրաքանչյուր փաստաթուղթ պետք է ունենա նշում կատարողի մասին (անուն, ազգանուն, հեռախոսահամար), որը գրվում է ստորագրված փաստաթղթի վերջին թերթի երեսի կողմի ներքևի ձախ անկյունում:

24. Առաքման ենթակա փաստաթղթերի վրա դրվում է ելից համար, ամսաթիվ և փաստաթուղթն ստորագրողի պայմանանիշը: Այն դեպքում, երբ առաքվող փաստաթուղթը ուղարկվում է ստացված գրությանն ի պատասխան, նշվում է նաև այդ գրության ամսաթիվը և համարը:

25. Ելից փաստաթղթերի համար կիրառվում են հետևյալ պայմանանիշերը.

1) Հանձնաժողովի նախագահ 01

2) Հանձնաժողովի նախագահի տեղակալ 02

3) Հանձնաժողովի քարտուղար 03:

26. Առաքվող ելից փաստաթուղթը կազմվում և ստորագրվում է երկու օրինակից: Օրինակներից մեկն ուղարկվում է հասցեատիրոջը, իսկ երկրորդ օրինակը կատարման հիմքերի հետ պահվում է Մասնագետի մոտ:

27. Առաքվող ելից փաստաթղթին լրացուցիչ նյութեր կցելու դեպքում տեքստի տակ նշվում է դրանց անվանումն ու թերթերի թիվը:

28. Մասնագետը ստուգում է առաքվող ելից փաստաթղթի ամբողջականությունը:

29. Փաստաթղթերի առաքումը կազմակերպվում է Մասնագետի կողմից՝ սուրհանդակային ծառայության կամ փոստի միջոցով:

Փաստաթղթերն առձեռն հասցեատիրոջը հանձնելու ժամանակ գրանցվում են փաստաթղթերի ելքագրման գրանցամատյանում և ստացողի կողմից գրավոր ստացականի կամ փաստաթղթի պատճենի վրա համապատասխան նշում կատարելուց հետո հանձնվում նրան։ Այս դեպքում ստացականում կամ պատճենի վրա պարտադիր նշվում է հանձնված փաստաթղթի անվանումը, կից հանձնվող փաստաթղթերի թերթերի թիվը, ինչպես նաև ստացողի անունը, ազգանունը, հանձնման ամսաթիվը, անհրաժեշտության դեպքում` նաև ժամը, որը ստորագրվում է ստացողի կողմից, այնուհետև կցվում է Մասնագետի մոտ մնացող փաստաթղթին (հիմքին):

30. Արցախի Հանրապետության օրենսդրությամբ նախատեսված դեպքերում` որպես ծանուցման եղանակ կարող են օգտագործվել հեռախոսագրերը: Դրանք պետք է կազմվեն հստակ ու համառոտ:

Հեռախոսագրերը ստորագրվում են Հանձնաժողովի նախագահի կողմից:

Հեռախոսագրի վրա դրվում է ելից համար, նշվում` հաղորդող և ընդունող անձանց ազգանունները, հեռախոսների համարները, ինչպես նաև հաղորդման ընդունման ամսաթիվն ու ժամը:

31. Ելից փաստաթղթի համարը կազմված է սույն կարգի 24-րդ և 25-րդ կետերով սահմանված պայմանանիշից և գրանցամատյանի հերթական ելից համարից:

32. Մասնագետն ապահովում է փաստաթղթերի պահպանությունը և Արցախի Հանրապետության օրենսդրությամբ սահմանված կարգով արխիվացումը: Պահպանության համար փաստաթղթերը Մասնագետն ընդունում է ըստ ցանկի:

4. ՔԱՂԱՔԱՑԻՆԵՐԻ ԴԻՄՈՒՄՆԵՐԻ, ԲՈՂՈՔՆԵՐԻ ՈՒ

ԱՌԱՋԱՐԿՈՒԹՅՈՒՆՆԵՐԻ ԳՐԱՆՑՈՒՄԸ, ՇԱՐԺԸ ԵՎ ԱՌԱՔՈՒՄԸ

33. Քաղաքացիների կողմից ստացված դիմումների, բողոքների ու հանրագրերի (այսուհետ` դիմում) գրանցման և հաշվառման համար վարվում է առանձին գրանցամատյան:

34. Դիմումների մուտքագրումը և դրանց վերաբերյալ պատասխանների ելքագրումը կատարվում է Ընտրական օրենսգրքին, «Հանրագրերի մասին» և «Վարչարարության հիմունքների և վարչական վարույթի մասին» օրենքներին համապատասխան: