ԱՐՑԱԽԻ ՀԱՆՐԱՊԵՏՈՒԹՅԱՆ ԴԻՎԱՆԱԳԻՏԱԿԱՆ

ՆԵՐԿԱՅԱՑՈՒՑՉՈՒԹՅՈՒՆՆԵՐՈՒՄ ԵՎ ՀՅՈՒՊԱՏՈՍԱԿԱՆ

ՀԻՄՆԱՐԿՆԵՐՈՒՄ ԸՆՏՐՈՒԹՅՈՒՆՆԵՐԻ ՆԱԽԱՊԱՏՐԱՍՏՄԱՆ,

ԿԱԶՄԱԿԵՐՊՄԱՆ ԵՎ ԱՆՑԿԱՑՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով Արցախի Հանրապետության ընտրական օրենսգրքի 10-րդ հոդվածի 4-րդ մասով և 62-րդ հոդվածի 1-ին մասի 2-րդ կետով` Արցախի Հանրապետության կենտրոնական ընտրական հանձնաժողովը որոշում է.

1. Սահմանել Արցախի Հանրապետության դիվանագիտական ներկայացուցչություններում և հյուպատոսական հիմնարկներում ընտրությունների նախապատրաստման, կազմակերպման և անցկացման կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

1. Այլ պետություններում բնակվող կամ գտնվող Արցախի Հանրապետության ընտրական իրավունք ունեցող քաղաքացիները (այսուհետ՝ ընտրողներ) համապետական ընտրություններին (այսուհետ` ընտրություններ) մասնակցում են Արցախի Հանրապետության դիվանագիտական ներկայացուցչություններում կամ հյուպատոսական հիմնարկներում (այսուհետ՝ Հիմնարկ):

2. Ընտրությունների նախապատրաստման, կազմակերպման և անցկացման ընթացքում ընտրողների քվեարկությանը մասնակցելու իրավունքն ապահովում է Արցախի Հանրապետության դիվանագիտական ներկայացուցչության կամ հյուպատոսական հիմնարկի ղեկավարը (այսուհետ՝ Հիմնարկի ղեկավար)` Արցախի Հանրապետության ընտրական օրենսգրքով և Կենտրոնական ընտրական հանձնաժողովի որոշումներով սահմանված կարգով:

3. Օտարերկրյա պետություններում քվեարկությունն անցկացվում է տեղամասային կենտրոններում, քվեարկության օրը` տեղական ժամանակով ժամը 8.00 -ից մինչև ժամը 20.00-ն:

4. Ընտրողների ցուցակները (այդ թվում՝ քվեարկության օրը կազմվող լրացուցիչ ցուցակները) կազմում, ստորագրում և կնքում է Հիմնարկի ղեկավարը` Արցախի Հանրապետության ընտրական օրենսգրքով սահմանված կարգով՝ ընտրողի հայտի (դիմումի) հիման վրա:

5. Հիմնարկի ղեկավարը ընտրողների ցուցակները քվեարկության օրվանից ոչ ուշ, քան 4 օր առաջ ուղարկում է լիազոր մարմին (Արցախի Հանրապետության ոստիկանություն)՝ այդ ցուցակներում ընդգրկված ընտրողներին ըստ հաշվառման վայրի ընտրողների ցուցակներից հանելու համար:

6. Ընտրությունների անցկացումը նախապատրաստելու, կազմակերպելու և քվեարկության արդյունքներն ամփոփելու նպատակով Հիմնարկի ղեկավարը կազմավորում է ընտրական տեղամասեր և ձևավորում ընտրական հանձնաժողովներ` ընտրական իրավունք ունեցող Արցախի Հանրապետության քաղաքացիներից:

7. Օտարերկրյա պետություններում ընտրական տեղամասեր և տեղամասային կենտրոններ կազմավորվում են Հիմնարկներում՝ քվեարկության օրվանից ոչ ուշ, քան 45 օր առաջ համարակալվում են համապատասխան Հիմնարկի ղեկավարի կողմից և երկօրյա ժամկետում ուղարկվում են Կենտրոնական ընտրական հանձնաժողով:

8. Հիմնարկներում կազմավորված ընտրական տեղամասերը համարակալվում են m/n տեսքի, որտեղ m-ը համապատասխան Հիմնարկի գտնվելու վայրի (քաղաքի) անվանման առաջին տառն է, իսկ n-ը՝ այդ Հիմնարկում (քաղաքում) կազմավորված ընտրական տեղամասի հերթական համարը՝ յուրաքանչյուր քաղաքի համար սկսած 1-ից մինչև այդ քաղաքում կազմավորված հերթական վերջին տեղամասը:

9. Կենտրոնական ընտրական հանձնաժողովն էլեկտրոնային փոստով կամ Արցախի Հանրապետության արտաքին գործերի նախարարության միջոցով քվեարկությունից 7 օր առաջ Հիմնարկներ է ուղարկում.

1) ընտրությունների մասին Արցախի Հանրապետության իրավական ակտերի օրինակները.

2) քվեաթերթիկների, ընտրական այլ փաստաթղթերի նմուշները.

3) Հանրապետության նախագահի` գրանցված թեկնածուների տվյալները, Ազգային ժողովի ընտրություններին մասնակցող կուսակցությունների (կուսակցությունների դաշինքների) գրանցված ընտրական ցուցակները:

10. Հիմնարկի ղեկավարն ապահովում է քվեաթերթիկների տպագրումը` Արցախի Հանրապետության ընտրական օրենսգրքի պահանջներին և Կենտրոնական ընտրական հանձնաժողովի կողմից հաստատված նմուշին համապատասխան:

11. Հիմնարկում կազմավորված ընտրական տեղամասում քվեարկության արդյունքների ամփոփման արձանագրությունը կնքվում է Հիմնարկի կնիքով:

12. Հիմնարկի ղեկավարն ընտրական տեղամասում քվեարկության արդյունքներն ամփոփում է քվեարկության ավարտից հետո՝ ոչ ուշ, քան 12 ժամվա ընթացքում և այդ տվյալներն էլեկտրոնային փոստով անհապաղ ուղարկում Կենտրոնական ընտրական հանձնաժողով:

13. Քվեարկության արդյունքների վերաբերյալ արձանագրությունները՝ ընտրական փաստաթղթերի հետ միասին կնքված վիճակում, հատուկ փոստով ուղարկվում են Կենտրոնական ընտրական հանձնաժողով: