ԱՐՑԱԽԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք.Ստեփանակերտ

Հիմք ընդունելով Ընդերքի մասին օրենսգրքի 20-րդ հոդվածի 4-րդ մասը և 80-րդ հոդվածը` Արցախի Հանրապետության կառավարությունը ո ր ո շ ու մ  է.

1. Սահմանել ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվության տրամադրման կարգը` համաձայն N 1 հավելվածի:

2. Ստեղծել ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվության տրամադրման հարցերով միջգերատեսչական հանձնաժողով (այսուհետ` միջգերատեսչական հանձնաժողով) և հաստատել միջգերատեսչական հանձնաժողովի`

1) աշխատակարգը` համաձայն N 2 հավելվածի.

2) կազմը` համաձայն N 3 հավելվածի:

3. Արցախի Հանրապետության բնապահպանության և բնական ռեսուրսների նախարարին՝ սույն որոշումն ուժի մեջ մտնելուց հետո հաստատել միջգերատեսչական հանձնաժողովի անհատական կազմը:

4. Սահմանել, որ ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվությունները տրամադրվում են յուրաքանչյուր դեպքի համար` Արցախի Հանրապետության կառավարության որոշմամբ` Արցախի Հանրապետության բնապահպանության և բնական ռեսուրսների նախարարի ներկայացմամբ:

5. Սույն որոշումն ուժի մեջ է մտնում պաշտոնական հրապարակմանը հաջորդող տասներորդ օրվանից:

1. Սույն կարգով կարգավորվում են ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվության տրամադրման գործընթացի հետ կապված հարաբերությունները:

2. Ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվություն ստանալու նպատակով Արցախի Հանրապետության բնապահպանության և բնական ռեսուրսների նախարարություն (այսուհետ` լիազոր մարմին) է ներկայացվում դիմում և դրան կից հետևյալ փաստաթղթերը`

1) իրավաբանական անձի պետական գրանցման համարը.

2) ատոմային էներգիայի միջազգային գործակալության ցուցանիշներին համապատասխանության մասին տեղեկանք, որը երաշխավորում է ռադիոակտիվ հումքի երկրաբանական ուսումնասիրության փորձի առկայությունը: Տեղեկանքի ձևը սահմանում է լիազոր մարմինը:

3. Ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման հայտ ներկայացնելու համար հատուկ թույլտվությունը տրվում է 1 տարի ժամկետով:

4. Սույն կարգի 3-րդ կետով սահմանված ժամկետում ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման հայտ չներկայացնելու դեպքում հատուկ թույլտվություն տրվում է սույն կարգի պահանջներին համապատասխան:

5. Սույն կարգի 2-րդ կետով սահմանված փաստաթղթերը լիազոր մարմնում մուտքագրվելուց հետո 3 աշխատանքային օրվա ընթացքում դրանք ներկայացվում են միջգերատեսչական հանձնաժողովի քննարկմանը:

6. Միջգերատեսչական հանձնաժողովը սույն կարգի 5-րդ կետով սահմանված փաստաթղթերն ստանալուց հետո 7 աշխատանքային օրվա ընթացքում լիազոր մարմնին է տրամադրում հանձնաժողովի եզրակացությունը:

7. Միջգերատեսչական հանձնաժողովի դրական եզրակացությունն ստանալու պահից 3 աշխատանքային օրվա ընթացքում լիազոր մարմնի ղեկավարը ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվության տրամադրման համար Արցախի Հանրապետության կառավարություն է ներկայացնում Արցախի Հանրապետության կառավարության որոշման նախագիծը և միջգերատեսչական հանձնաժողովի դրական եզրակացությունը:

8. Լիազոր մարմնի ղեկավարը ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվության տրամադրման վերաբերյալ միջգերատեսչական հանձնաժողովի բացասական եզրակացությունն ստանալուց հետո 2-օրյա ժամկետում տեղեկացնում է դիմումատուին դրա մասին:

9. Միջգերատեսչական հանձնաժողովը բացասական եզրակացություն է տալիս, եթե սույն կարգի 2-րդ կետի համաձայն ներկայացված փաստաթղթերը չեն համապատասխանում սույն կարգի պահանջներին:

10. Լիազոր մարմինը ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվություն տալու մասին Արցախի Հանրապետության կառավարության համապատասխան որոշումն ուժի մեջ մտնելուց հետո 2-օրյա ժամկետում տեղեկացնում է դիմումատուին:

11. Ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվություն տալու մասին Արցախի Հանրապետության կառավարության համապատասխան որոշման ընդունման դեպքում հատուկ թույլտվություն ստացած իրավաբանական անձը կարող է ընդերքօգտագործման իրավունք ձեռք բերել Ընդերքի մասին օրենսգրքով սահմանված կարգով:

12. Սույն կարգի 2-րդ կետի 2-րդ ենթակետում սահմանված հատուկ թույլտվության տրամադրման համար հիմք հանդիսացած պահանջների պահպանման պարտականության վերաբերյալ դրույթները լիազոր մարմնի կողմից ներառվում են Ընդերքի մասին օրենսգրքի 34-րդ հոդվածով նախատեսված կնքվելիք պայմանագրում:

1. Սույն աշխատակարգով կարգավորվում են միջգերատեսչական հանձնաժողովի կողմից եզրակացություններ տալու և միջգերատեսչական հանձնաժողովի գործունեության կազմակերպման ընթացակարգի հետ կապված հարաբերությունները:

2. Միջգերատեսչական հանձնաժողովն իր գործունեության ընթացքում ղեկավարվում է Ընդերքի մասին օրենսգրքով, սույն որոշմամբ և այլ իրավական ակտերով:

3. Միջգերատեսչական հանձնաժողովի գործառույթներն են`

1) ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվություն ստանալու համար սույն որոշմամբ պահանջվող փաստաթղթերի (այսուհետ` փաստաթղթեր) լիակազմության ու արժանահավատության ստուգումը.

2) ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվության տրամադրման նպատակահարմարության մասին հիմնավորված եզրակացության կազմումը:

4. Միջգերատեսչական հանձնաժողովի աշխատանքները կազմակերպվում են նիստերի միջոցով:

5. Միջգերատեսչական հանձնաժողովի նիստերը հրավիրվում են համապատասխան դիմումն ու դրան կից փաստաթղթերը լիազոր մարմնի կողմից ստանալուց հետո` երեք աշխատանքային օրվա ընթացքում:

6. Միջգերատեսչական հանձնաժողովի նիստերն իրավազոր են, եթե դրանց մասնակցում են միջգերատեսչական հանձնաժողովի անդամների թվի կեսից ավելին: Միջգերատեսչական հանձնաժողովի որոշումներն ընդունվում են քվեարկությամբ` միջգերատեսչական հանձնաժողովի անդամների ընդհանուր թվի ձայների պարզ մեծամասնությամբ: Քվեարկության արդյունքում միջգերատեսչական հանձնաժողովի անդամների ձայների հավասարության դեպքում` միջգերատեսչական հանձնաժողովի նախագահի ձայնը վճռորոշ է:

7. Միջգերատեսչական հանձնաժողովի նիստերը վարում է միջգերատեսչական հանձնաժողովի նախագահը, իսկ նրա բացակայության դեպքում` միջգերատեսչական հանձնաժողովի նախագահի տեղակալը:

8. Միջգերատեսչական հանձնաժողովի նախագահը`

1) հրավիրում է միջգերատեսչական հանձնաժողովի նիստերը և նախագահում դրանք.

2) կազմակերպում է միջգերատեսչական հանձնաժողովի աշխատանքները և վերահսկողություն իրականացնում նրա կողմից ընդունված որոշումների կատարման նկատմամբ.

3) ստորագրում է միջգերատեսչական հանձնաժողովի եզրակացությունները և նրա գործունեության հետ առնչվող մյուս փաստաթղթերը.

4) իրականացնում է սույն որոշումից բխող այլ լիազորություններ:

9. Միջգերատեսչական հանձնաժողովի նախագահի տեղակալը`

1) միջգերատեսչական հանձնաժողովի նախագահի բացակայության դեպքում փոխարինում է նրան.

2) միջգերատեսչական հանձնաժողովի նիստերին զեկուցում է ստացված դիմումի ու դրան կից փաստաթղթերի լիակազմության մասին.

3) ապահովում է ռադիոակտիվ հումքի երկրաբանական ուսումնասիրության նպատակով ընդերքօգտագործման իրավունքի ձեռքբերման համար հատուկ թույլտվության տրամադրման նպատակահարմարության մասին եզրակացության ձևակերպումը:

10. Միջգերատեսչական հանձնաժողովի քարտուղարը`

1) ուսումնասիրում և գրանցում է ստացված դիմումն ու դրան կից փաստաթղթերի լիակազմությունը.

2) միջգերատեսչական հանձնաժողովի անդամներին տեղեկացնում է նիստի անցկացման օրվա, ժամի և վայրի մասին.

3) նախապատրաստում է միջգերատեսչական հանձնաժողովի նիստում քննարկվելիք նյութերը.

4) գրանցում է միջգերատեսչական հանձնաժողովի նիստի արձանագրությունները և ապահովում միջգերատեսչական հանձնաժողովի անդամների ստորագրությունները:

Արցախի Հանրապետության բնապահպանության և բնական ռեսուրսների նախարար (միջգերատեսչական հանձնաժողովի նախագահ)

Արցախի Հանրապետության ազգային անվտանգության ծառայության տնօրենի տեղակալ (միջգերատեսչական հանձնաժողովի նախագահի տեղակալ)

Արցախի Հանրապետության բնապահպանության և բնական ռեսուրսների նախարարի տեղակալ

Արցախի Հանրապետության էկոնոմիկայի և արտադրական ենթակառուցվածքների նախարարի տեղակալ

Արցախի Հանրապետության արտակարգ իրավիճակների պետական ծառայության տնօրենի տեղակալ

Արցախի Հանրապետության քաղաքաշինության նախարարի տեղակալ

Արցախի Հանրապետության առողջապահության նախարարության պետական հիգիենիկ և հակահամաճարակային տեսչության պետ

Արցախի Հանրապետության բնապահպանության և բնական ռեսուրսների նախարարության աշխատակազմի բնական ռեսուրսների, թափոնների և մթնոլորտ արտանետումների կառավարման գործակալության պետ

Արցախի Հանրապետության բնապահպանության և բնական ռեսուրսների նախարարության աշխատակազմի բնական ռեսուրսների, թափոնների և մթնոլորտ արտանետումների կառավարման գործակալության ընդերքի տրամադրման և օգտակար հանածոների պաշարների բաժնի պետ (միջգերատեսչական հանձնաժողովի քարտուղար)