ք. Ստեփանակերտ

Հիմք ընդունելով «Պատմության և մշակույթի անշարժ հուշարձանների և պատմական միջավայրի պահպանության և օգտագործման մասին» օրենքի 26-րդ և «Նորմատիվ իրավական ակտերի մասին» օրենքի 41-րդ հոդվածները` Արցախի Հանրապետության կառավարությունը ո ր ո շ ու մ է.

1. Հաստատել`

1) Միջգերատեսչական հնագիտական հանձնաժողովի կանոնադրությունը` համաձայն N 1 հավելվածի.

2) Միջգերատեսչական հնագիտական հանձնաժողովի կազմը` համաձայն N 2 հավելվածի:

2. Ուժը կորցրած ճանաչել Արցախի Հանրապետության կառավարության 2019 թվականի մայիսի 31-ի «Միջգերատեսչական հնագիտական հանձնաժողովի կանոնադրությունն ու կազմը հաստատելու և Լեռնային Ղարաբաղի Հանրապետության կառավարության 2013 թվականի մայիսի 30-ի N 319-Ն որոշումն ուժը կորցրած ճանաչելու մասին» N 434-Ն որոշումը:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Կ Ա Ն Ո Ն Ա Դ Ր ՈՒ Թ Յ ՈՒ Ն

1. Միջգերատեսչական հնագիտական հանձնաժողովը հուշարձանների հետախուզման և հնագիտական պեղումների թույլտվության, նպատակահարմարության, արդյունավետության խնդիրները քննարկող և գիտամեթոդական եզրակացություններ տվող մարմին է:

2. Միջգերատեսչական հնագիտական հանձնաժողովի (այսուհետ` Հանձնաժողով) եզրակացությունները Արցախի Հանրապետության կրթության, գիտության, մշակույթի և սպորտի նախարարության (այսուհետ՝ Նախարարություն) կողմից հաստատվելուց հետո պարտադիր են հուշարձանների հետախուզում և հնագիտական պեղումներ իրականացնող իրավաբանական ու ֆիզիկական անձանց համար:

3. Հանձնաժողովն իր գործունեության ընթացքում ղեկավարվում է Արցախի Հանրապետության Սահմանադրությամբ, Արցախի Հանրապետության օրենսդրությամբ, ինչպես նաև սույն կանոնադրությամբ:

4. Հանձնաժողովի խնդիրներն ու գործառույթներն են`

1) հանրապետության տարածքում գտնվող հուշարձանների հետախուզման և հնագիտական պեղումների վերաբերյալ գիտական հաշվետվությունների, նյութերի, փաստաթղթերի և տեղեկությունների ստացումն ու քննարկումը.

2) հանրապետության տարածքում գտնվող հուշարձանների հետախուզման և հնագիտական պեղումների ու գիտահետազոտական ծրագրերի, նախագծերի և նպատակային աշխատանքների քննարկումն ու դրանց իրականացման անհրաժեշտության վերաբերյալ համապատասխան եզրակացություն տալը.

3) հանրապետության տարածքում գտնվող հուշարձանների հետախուզման և հնագիտական պեղումների կատարման թույլտվության վերաբերյալ եզրակացություն տալը.

4) հանրապետության տարածքում գտնվող հուշարձանների հետախուզման և հնագիտական պեղումների ծրագրերի ու աշխատանքների համակարգված իրականացման նպատակով Արցախի Հանրապետության և օտարերկրյա շահագրգիռ իրավաբանական և ֆիզիկական անձանց հետ համագործակցության ապահովումը:

5. Հանձնաժողովն անհրաժեշտության դեպքում Նախարարություն է ներկայացնում առաջարկություններ Արցախի Հանրապետության օտարերկրյա պետությունների տարածքներում գտնվող վտանգված հայկական հուշարձանների պահպանման միջոցառումների իրականացման, ինչպես նաև դրանց հետախուզման, հնագիտական պեղումների և ֆինանսավորման վերաբերյալ:

6. Հանձնաժողովի գործունեության հետ կապված ծախսերը, Նախարարության սահմանած կարգով, փոխհատուցվում են հնագիտական պեղումներ ձեռնարկողների տրամադրած միջոցներից:

7. Հանձնաժողովի` հնավայր մեկնման տրանսպորտային ծախսերը սահմանվում են տվյալ պահին գործող շուկայական գներով, իսկ օրապահիկը` Արցախի Հանրապետության կառավարության կողմից սահմանված չափերով:

8. Հանձնաժողովն իր աշխատանքը կազմակերպում է նիստերի ձևով, ազատ քննարկման և հրապարակայնության պայմաններում, իսկ անհրաժեշտության դեպքում` հուշարձանների տարածքում: Նիստերը հրավիրվում են ըստ անհրաժեշտության:

9. Հանձնաժողովի աշխատանքը ղեկավարում է Հանձնաժողովի նախագահը:

10. Հանձնաժողովի նախագահը`

1) հրավիրում է Հանձնաժողովի նիստերը և վարում դրանք.

2) կազմակերպում է Հանձնաժողովի աշխատանքները, պատասխանատվություն կրում Հանձնաժողովի խնդիրների և գործառույթների իրականացման համար:

11. Հանձնաժողովի նախագահի բացակայության ժամանակ նրա պարտականությունները կատարում է Հանձնաժողովի նախագահի տեղակալը:

12. Հանձնաժողովի քարտուղարը`

1) նախապատրաստում է Հանձնաժողովի նիստի օրակարգը, կազմակերպում նիստերի անցկացումը.

2) իրականացնում է Հանձնաժողովի ընթացիկ կազմակերպման և տեխնիկական աշխատանքները.

3) համակարգում և քննարկման է ներկայացնում Հանձնաժողովի գործունեությանն առնչվող ընթացիկ հարցերը.

4) կազմում և Հանձնաժողովի նախագահին է ներկայացնում հաշվետվություն ընթացիկ աշխատանքների վերաբերյալ:

13. Հանձնաժողովի անդամները Հանձնաժողովի նիստից առնվազն երկու շաբաթ առաջ, Հանձնաժողովի նիստի օրակարգում ընդգրկելու նպատակով, առաջադրում են հարցեր և Հանձնաժողովի նիստից առնվազն մեկ շաբաթ առաջ կարծիք հայտնում դրա օրակարգի վերաբերյալ:

14. Հանձնաժողովի նիստերն իրավազոր են, եթե դրանց մասնակցում է Հանձնաժողովի անդամների կեսից ավելին: Հանձնաժողովի որոշումներն ընդունվում են, եթե դրանց օգտին քվեարկել է նիստին մասնակցած անդամների կեսից ավելին: Հանձնաժողովի նախագահի ձայնը վճռորոշ է:

15. Հանձնաժողովը իր աշխատանքներին կարող է խորհրդակցական ձայնի իրավունքով մասնակից դարձնել այլ մասնագետների և փորձագետների:

16. Նախարարության և Հանձնաժողովի միջև ծագած տարաձայնությունների դեպքում Նախարարությունը կենսագործում է իր ընդունած որոշումը` դրա մասին տեղյակ պահելով Արցախի Հանրապետության կառավարությանը:

17. Հանձնաժողովի նիստերի արձանագրությունները` դրանց անցկացման պահից, իսկ որոշումները` պետական լիազորված մարմնի կողմից հաստատվելու պահից տասնօրյա ժամկետում ուղարկվում են Հանձնաժողովի անդամներին և համապատասխան շահագրգիռ կազմակերպություններ:

18. Հանձնաժողովի գործունեությունը դադարում է Արցախի Հանրապետության օրենսդրությամբ սահմանված կարգով:

Կ Ա Զ Մ